ⵜⵉⵎⴰⵡⴰⵢⵉⵏ ⵏ ⵡⴰⵜⵍⴰⵙ

ⵜⵉⵎⴰⵡⴰⵢⵉⵏ ⵏ ⵡⴰⵜⵍⴰⵙ

* ⴰⵡⴰ ⴰ ⵜⵉⵜⵔⵉⵜ ⴷ ⵡⴰⵢⵢⵓⵔ ⵏⵏⴰ ⴷ ⵉⵜⵜⵎⵓⵏ ⵉⵙ ⵜⵎⵎⵄⵊⴰⴱⵎ, ⴰⵢⵏⵏⴰⵖ ⴰⵢ ⵏⴳⴰ ⴷ ⵓⵙⵎⵓⵏ ⵉⵏⵓ.

*ⵜⴰⵙⵙⴰⵄⵜ ⴰ ⵅⵙ ⵢⵓⴽ ⵓⴱⵔⴷⵓⵣ ⴰⵢ ⵏⵍⵍⴰⵙ ⵎⵉ ⵢⴼⵜⴰ ⵉⵖⵉⵔ, ⵏⴳⴰ ⴰⵙ ⴱⵏⵉⴷ ⴰⵙ ⵉ ⵍⵓⵇⵇⵜ.

*ⴰ ⵢⴰⵊⵎⵉⵍ ⵜⵢⵉ ⵜ ⵉⵜ ⴰ ⵜⵓⴳⴰ, ⵎⵛ ⴷⴷⵉⵖ ⵙ ⴰⵎⴷⴷⴰⴽⴽⵍ ⵉⵏⵉⵖ ⴰⵙⵏ ⵏⵃⵛⵛⴰ ⴷ ⵉ ⵜⴼⵓⵏⴰⵙⵜ.

*ⴰ ⵢⴰⵢⴷ ⵉⵢ ⵜⵏⵏⵉⴷⴰⵏ ⵜⵜⴰⴳⴳⵯⴰ ⴷ ⵙ ⴰⵎⵎⴰⵙ ⵏ ⵉⵙⵎⴹⴰⵍ, ⵜⵖⴷⵔⵜ ⵢⵢⵉ ⴰ ⵡⴰ ⵢ ⵏⵃⵓⴱⴱⴰ ⵓⵔⵜⴰ ⵎⵎⵓⵜⵖ.

*ⴰ ⴷ ⴰⵎ ⵄⵇⵇⵍⵖ ⴰ ⵜⵉⴽⴽⵍⵜ ⴰ, ⴰ ⵛⵎ ⴰⵔⵓⵖ ⵙ ⵉⴹⵓⴹⴰⵏ, ⵓⵎⴰ ⴰⵖⴰⵏⵉⵎ ⵙⴷⵉⴷⵏⵜ ⵜⵉⵔⵔⴰ ⵏⵏⵙ.

* ⵓⵍ ⴰⴳⴳ ⵢⵍⵍⴰ ⵓⵎⵢⴰⵢⴰⵔ, ⵓⵎⴰ ⵜⵓⵖⵎⴰⵙ ⵜⵜⵚⵏⵜ ⵉ ⵡⴰⴷⴷⴰ ⵔⵉⵖ ⴷ ⵡⴰⴷⴷⴰ ⵓⵔ ⵃⵎⵉⵍⵖ.

* ⵎⵛ ⵢⵉ ⵜⵖⴷⵔⴷ ⴰ ⵡⴰⵢ ⵏⵃⵓⴱⴱⴰ ⵔⵜⵉⵖ ⴰⵡⵏ ⴰⴷ ⵜⵢⵉⵎ ⴰⵅⴷⵓⵍ ⵏ ⵡⵓⴷⵉ ⵓⴳⴳⴰⵔ ⵏ ⵜⴰⴼⵓⵢⵜ.

* ⵓⵏⵏⴰ ⵓⵔ ⵢⵢⵉ ⵢⵃⵎⵉⵍ ⴰⵢⴷ  ⵢⵙⵙⴰⵡⴰⵍⵏ, ⵓⵎⴰ ⵓⵏⵏⴰ ⵖⵔ ⵄⵣⵣⵉⵖ ⵢⴳⴰ ⵢⴰⵙ ⵍⵄⵉⴱ ⵉⵏⵓ ⴰⵙⴰⵡⵏ.

* ⵢⴽⴽⴰ ⴷ ⵍⵇⵏⴷ ⴰⴱⵓⴹ ⵏ ⵜⴰⴷⴷⴰⵔⵜ, ⵢⴽⴽⴰ ⴷ ⵍⴰⵊⴱⴰⵍ ⵎⵔⴰⵔⴰⵏ ⵉⴳⵓⴷⴰⵔ ⵜⴰⵍⴰ ⵏⵓ.

* ⴰ ⵡⴰⵢ ⴷ ⵉⵜⵜⵉⴷⵓⵏ ⴳ ⵓⴱⵔⵉⴷ ⵢⵜⵛⵉ ⵡⵓⵛⵛⵏ, ⴰⵙⵙⵉⵏ ⵢⵉ ⵜⵢⵓⵔ, ⵓⵍⴰ ⵄⵉⵛⵏ ⴷⵉⴳⵉ ⵉⵅⵎⵎⵉⵎⵏ.

(ⵉⵙ ⴰⵖ ⵜ ⵉⴳⴰ ⵔⵔⴰⵢ ⵉⵏⵡ)

* ⴰ ⵢⴰⵊⴷⴷⵉⴳ ⵏ ⵄⴰⵔⵉ ⴷⵔ ⴷ ⴰⵛ ⵏⴰⵔⵓ ⵙⵙⵍⴰⵎ ⴳ ⵢⵉⴼⵔ, ⵢⵏⵉ ⴰⵙ ⵉ ⵡⵃⴱⵉⴱ ⴰⵡⵔⴰ ⵖⵓⵔⵖ.

* ⵡⴰ ⵀⴰⵏ ⵛⴰ ⵢⵜⵜⵉⵏⵉⵏ ⵢⵅⵓⴱ ⴰⵙ ⵡⴰⴹⵓ, ⵓⵏⵏⴰ ⵓⵔ ⵢⴰⵖ ⵛⴰ ⵜⵔⵔⴰ ⵚⵚⴰⵃⵜ ⵎⴰ ⴳⴳⴰⵏ ⵜⴰⵡⴰⵏⵜ.

* ⵎⵔ ⴷⴰ ⵜⴱⵏⵏⵓ ⵣⵣⴰⵅⵜ ⵉⵅⴰⵎⵏ, ⴰⵔ ⴱⵏⵉⵖ ⵙⵉⵏ ⴱⵏⵓⵖ ⵉ ⵡⵃⴱⵉⴱ ⴰⵍⵜⵓ ⵡⵉⵏⵏⵙ.

*  ⵡⴰⵅⵅⴰ ⴷⴰ ⵖⵉⴼⵛ ⵜⴷⴷⵓⵖ ⴰ ⵢⴰⵛⴰⵍ ⵓⵔ ⵛ ⵃⵎⵉⵍⵖ, ⵉⵙ ⵜⵓⴷⵔⵜ ⵉ ⵡⴰ ⵢ ⵏⵃⵓⴱⴱⴰ ⵉⵏⵓ ⵇⵇⵉⵎⵖ.

* ⴰ ⵜⴰ ⵛⵎ ⴰⴳ ⵄⵣⵣⵉⵏ ⵖⵓⵔⵉ, ⵛⵎ ⴰ ⴳⴳⴰⵏ ⵜⵉⵟⵟ ⵉⵏⵓ, ⴰ ⵍⵓⵍⵉⵢⵜ ⵢⵟⵟⵚⵚⴰⵏ ⵍⵍⵉⵖ ⵏⵖⴰⴱ ⴰⵔ ⵜⴰⵍⵍⴰⵎⵜ.


*************
ⵢⵙⵎⵓⵏ ⵜⵏⵜ ⵎⵓⵃⴰⵎⴷ ⵓⵛⵛⵏ-ⵜⵓⵏⴼⵉⵜ
ⴰⵎⴰⴹⴰⵍ ⴰⵎⴰⵣⵉⵖ - ⵓⵟⵟⵓⵏ42 ⵉⴱⵔⵉⵔ 2004/2954